Opportunitajiet Kummerċjali tal-Global Gateway

Ikkontribwixxi għall-implimentazzjoni tal-proġetti tal-Global Gateway

Offerti u Sejħa għal Proposti

Żur il-Portal tal-Offerti tal-UE biex tfittex sejħiet għal proposti u offerti ppubblikati mill-istituzzjonijiet, l-aġenziji u l-korpi tal-UE. Uża l-opzjoni “Filtri Kollha” biex tagħżel il-pajjiżi sħab u tara l-offerti rilevanti. Tista’ tfittex skont il-pajjiż, ir-reġjun u s-settur, jew iddaħħal il-qasam ta’ interess tiegħek (eż., “enerġija”) fil-menù tat-tfittxija biex issib opportunitajiet li għaddejjin bħalissa fil-qasam tiegħek. Hemm disponibbli helpdesk u taqsima ta’ gwida biex jassistu fl-applikazzjoni għall-offerti u fit-tressiq ta’ proposti għall-għotjiet.

L-avviżi ta’ akkwist tista ssibhom ukoll fuq is-sit web tat-TED. Daħħal il-qasam ta’ interess tiegħek (eż., “diġitali”) u mbagħad iffiltra skont ir-reġjun.

Barra minn hekk, irrieżamina s-siti web tal-offerti tal-Istati Membri tal-UE. Tista’ tikkonsulta wkoll is-siti web tal-ministeri tal-gvern f’pajjiżi sħab, fejn jiġu ppubblikati sejħiet għall-offerti għal investimenti mhux implimentati direttament mill-UE.

Issieħeb ma’ proġetti li għaddejjin bħalissa

Il-proġetti tal-Global Gateway joħolqu opportunitajiet kummerċjali ġodda billi jimmobilizzaw il-partijiet ikkonċernati u r-riżorsi rilevanti u jneħħu l-ostakli għan-negozji. Irrieżamina l-lista tal-proġetti tal-Global Gateway u vvaluta jekk humiex qed jinfetħu opportunitajiet ġodda għall-kumpanija tiegħek. Biex tivvaluta aħjar l-opportunitajiet ekonomiċi potenzjali, tista’ tirċievi informazzjoni addizzjonali billi tikkuntattja lid-Delegazzjoni tal-UE jew lill-istituzzjoni tal-Istati Membri tal-UE rilevanti.

Jekk tixtieq tirċievi appoġġ għal proposta ta’ proġett marbuta mal-Global Gateway, irrieżamina l-programmi ta’ appoġġ disponibbli għall-kumpaniji.

Jekk tixtieq tippreżenta proposta għal proġett ta’ investiment kbir, strateġiku u trasformattiv, ibda l-involviment tiegħek billi tikkuntattja lid-Delegazzjoni tal-UE rilevanti.

Appoġġ għall-inizjattivi kummerċjali

L-UE tipprovdi diversi tipi ta’ appoġġ finanzjarju u mhux finanzjarju għall-inizjattivi kummerċjali. F’dan ir-rigward, id-delegazzjonijiet tal-UE jiffaċilitaw id-djalogu pubbliku-privat u jakkumpanjaw proġetti ta’ investiment rilevanti, permezz ta’ assistenza teknika, żvilupp tal-ħiliet, titjib tal-ambjent regolatorju u appoġġ finanzjarju fost l-oħrajn. Fil-pjanijiet ta’ azzjoni tal-pajjiż u l-programmi indikattivi pluriennali hi disponibbli informazzjoni dwar prijoritajiet settorjali bejn l-UE u l-pajjiżi sħab. Dawn id-dokumenti huma disponibbli fuq il-paġni tal-pajjiżi tas-siti web tal-INTPA u tan-NEAR.

L-Istituzzjonijiet ta’ Finanzjament għall-Iżvilupp (DFIs), l-Aġenziji ta’ Kreditu għall-Esportazzjoni (ECAs) tal-Istati Membri tal-UE, u l-aġenziji tal-Kooperazzjoni għall-Iżvilupp jipprovdu diversi servizzi finanzjarji lill-inizjattivi tas-settur privat f’pajjiżi sħab. Skopri aktar dwar id-DFIs u l-ECAs hawn taħt. Barra minn hekk, irrieżamina l-appoġġ ipprovdut mill-Istati Membri tal-UE lill-kumpaniji li joperaw barra mill-pajjiż.

Inizjattivi ffinanzjati mill-UE jappoġġjaw lin-negozji li joperaw fis-setturi tal-Global Gateway mad-dinja kollha. 

Ikklikkja hawn biex issib ħarsa ġenerali lejn dawn l-inizjattivi

Eżempji tal-programmi ta’ appoġġ dirett għall-kumpaniji jinkludu:

• EFSD+
  Il-Fond Ewropew għall-Iżvilupp Sostenibbli Plus (EFSD+) huwa għodda ta’ finanzjament tal-UE li tappoġġja lill-investituri privati u pubbliċi. Hu jipprovdi firxa wiesgħa ta’ tipi ta’ investimenti (eż. self, ekwità, investimenti ta’ dejn, self fil-munita lokali, eċċ.) f’diversi reġjuni (eż. l-Afrika sub-Saħarjana, l-Amerika Latina, l-Asja, il-Viċinat tan-Nofsinhar u tal-Lvant). L-investituri privati jenħtieġ li jirreżaminaw id-diversi għodod tal-EFSD+ u jikkomunikaw mal-punt ta’ kuntatt ta’ dawk rilevanti.
• GET Invest
  GET.invest jimmobilizza l-investiment fl-enerġija rinnovabbli fil-pajjiżi li qed jiżviluppaw. Hu jgħin lit-timijiet tal-proġetti jilħqu livell fejn ikunu lesti għall-investiment u jgħaqqadhom mal-finanzjaturi. Jiffaċilita wkoll l-aċċess għall-appoġġ Ewropew u l-istrumenti ta’ finanzjament għall-investimenti kollha tal-Enerġija Ekoloġika fl-Afrika.
• ElectriFI
  L-Inizjattiva ta’ Finanzjament tal-Elettrifikazzjoni (ElectriFI) hija faċilità ta’ investiment b’impatt ta’ €275+ miljun impenjata biex iżżid l-aċċess għall-enerġija nadifa fil-pajjiżi li qed jiżviluppaw. ElectriFI għandha l-għan li tappoġġja investimenti li jżidu u/jew itejbu l-aċċess għal servizzi tal-enerġija moderni, affordabbli u sostenibbli. 
• AgriFI
  EDFI AgriFI hija faċilità ta’ investiment b’impatt ta’ €120 miljun iffinanzjata mill-Unjoni Ewropea b’mandat li tipprovdi finanzjament fuq terminu medju sa twil lill-intrapriżi tas-settur privat attivi fil-katina tal-valur agroalimentari b’enfasi fuq il-bdiewa b’azjenda agrikola żgħira. L-offerta ta’ EDFI AgriFI tikkombina l-kapital tal-investiment u l-assistenza teknika.
• D4D Hub
  Iċ-Ċentru Diġitali għall-Iżvilupp (D4D) huwa pjattaforma strateġika u għandu l-għan li ssaħħaħ il-kooperazzjoni diġitali bejn l-Unjoni Ewropea u l-Istati Membri tagħha (Tim Ewropa) u s-sħab fl-Afrika, l-Asja u l-Paċifiku, l-Amerika Latina u l-Karibew, u l-pajjiżi ġirien tal-UE. Hu jrawwem il-kollaborazzjoni bejn diversi partijiet ikkonċernati, jagħti spinta lill-investimenti, jiffaċilita d-djalogu, u jżid il-koordinazzjoni. Il-Grupp konsultattiv tas-settur privat taċ-Ċentru D4D huwa l-mod iddedikat għall-kumpaniji biex jinvolvu ruħhom u jiddiskutu proposti fil-kuntest taċ-Ċentru D4D. 
• Switch Asia
  Switch Asia tappoġġja t-tranżizzjoni tal-Asja, il-Lvant Nofsani u l-Paċifiku lejn ekonomija b’livell baxx ta’ emissjonijiet ta’ karbonju, effiċjenti fir-riżorsi u ċirkolari filwaqt li tippromwovi xejriet ta’ produzzjoni u konsum sostenibbli, u ktajjen tal-provvista aktar ekoloġiċi bejn dawn ir-reġjuni u l-Ewropa. Hi tipprovdi għotjiet fl-oqsma bħall-effiċjenza enerġetika fl-impjanti u d-djar industrijali, is-setturi agroalimentari u tas-sajd, it-tessuti u l-ġilda, it-turiżmu, il-loġistika u l-merkanzija.

Appoġġ għall-SMEs

L-Unjoni Ewropea tirrikonoxxi r-rwol kruċjali li għandhom l-Intrapriżi Żgħar u ta’ Daqs Medju (SMEs) fit-tmexxija tat-tkabbir ekonomiku, l-innovazzjoni u l-ħolqien tal-impjiegi. Flimkien mal-programmi ta’ appoġġ imsemmija hawn fuq, l-UE toffri appoġġ speċifiku biex tgħin lill-SMEs jesportaw u jinvestu lil hinn mill-UE. Eżempji jinkludu:

• In-Network Enterprise Europe (EEN)
  L-EEN huwa l-akbar network ta’ appoġġ fid-dinja għall-SMEs b’ambizzjonijiet internazzjonali. L-esperti tan-negozju internazzjonali tan-Network għandhom l-esperjenza u r-riżorsi biex jgħinu lill-SMEs jikbru u jistgħu jagħtu pariri dwar l-aħjar opportunitajiet fis-suq biex jespandu internazzjonalment. L-EEN joffri firxa wiesgħa ta’ servizzi, inklużi r-riċerka tas-suq, it-tlaqqigħ tan-negozju, l-appoġġ għall-innovazzjoni, l-aċċess għall-finanzi, u l-aċċess għall-programmi ta’ finanzjament tal-UE.
• Helpdesk għall-Proprjetà intellettwali
  Il-Helpdesk għall-Proprjetà Intellettwali (PI) jipprovdi l-ewwel punt ta’ appoġġ bla ħlas lill-intrapriżi żgħar u ta’ daqs medju (SMEs) dwar il-ġestjoni, il-protezzjoni u l-infurzar tal-PI u jkopri sitt reġjuni differenti: iċ-Ċina, l-Ewropa, l-Indja, l-Amerka Latina, ix-Xlokk tal-Asja, u l-Afrika. Hu jipprovdi wkoll librerija ta’ materjali ta’ appoġġ bħal gwidi, studji ta’ każijiet, u videos.

Sib għodod oħra tal-UE li jappoġġaw l-internazzjonalizzazzjoni tal-SMEs tal-UE.

Ħu sehem fil-fora kummerċjali tal-UE

Il-fora kummerċjali tal-UE isiru mad-dinja kollha u jlaqqgħu flimkien lill-partijiet ikkonċernati tal-UE u lill-kumpaniji, lis-setturi privati lokali u lir-rappreżentanti tal-gvern ta’ livell għoli. Dawn il-fora jiffaċilitaw id-djalogu dwar suġġetti prijoritarji tal-Global Gateway. 

In-negozji huma mistiedna jieħdu sehem fil-fora kummerċjali tal-UE biex jiltaqgħu ma’ sħab ġodda, ifasslu l-proġett tagħhom u jinvolvu ruħhom fi djalogu pubbliku-privat.

Informazzjoni dwar l-aċċess għas-suq

L-UE tipprovdi riżorsi u appoġġ online biex tgħin lin-negozji f’operazzjonijiet globali. Bl-appoġġ tal-UE, iċ-Ċentru Internazzjonali għall-Kummerċ jipprovdi firxa wiesgħa ta’ għodod ta’ intelligence dwar in-negozju għall-SMEs, il-kumpaniji l-kbar, u l-organizzazzjonijiet tan-negozju:

• It-Trade Map tipprovdi indikaturi dwar il-prestazzjoni tal-esportazzjoni, id-domanda internazzjonali, is-swieq alternattivi u s-swieq kompetittivi, kif ukoll direttorju tal-kumpaniji tal-importazzjoni u tal-esportazzjoni.
• Il-Market Access Map tippermetti lill-utenti jaċċessaw, iqabblu, janalizzaw u jiddawnlowdjaw it-tariffi doganali, il-kwoti tar-rati tariffarji, ir-rimedji kummerċjali u l-miżuri mhux tariffarji applikabbli għal prodott speċifiku fi kwalunkwe suq fid-dinja.
• L-Export Potential Map tibdel l-analiżi ekonomika f’informazzjoni prattika dwar il-kummerċ.
• L-Istandards Map tipprovdi informazzjoni dwar l-istandards volontarji tas-sostenibbiltà (VSS), il-kodiċijiet ta’ kondotta, il-protokolli tal-awditjar, l-oqfsa ta’ rapportar u l-programmi ta’ sostenibbiltà kummerċjali.

Titjib tal-ambjent kummerċjali

L-UE tikkontribwixxi għat-titjib tal-ambjent kummerċjali fil-pajjiżi sħab. Dan iseħħ permezz ta’ firxa wiesgħa ta’ azzjonijiet inklużi d-djalogu, l-appoġġ tekniku u dak finanzjarju. L-impatt ta’ dawn l-attivitajiet huwa ta’ benefiċċju indirett għas-settur privat. Attivitajiet prominenti jinkludu dawk deskritti hawn taħt.

Il-Ftehimiet kummerċjali u ta’ investiment jgħinu biex itejbu l-ambjent tan-negozju fil-pajjiżi sħab. Huma jagħtu spinta lill-kummerċ u joħolqu opportunitajiet ġodda, jinċentivaw l-investimenti tal-UE permezz ta’ aktar ċertezza legali u stabbiltà, u jinkludu impenji b’saħħithom ta’ sostenibbiltà.

L-UE hija l-akbar fornitur ta’ appoġġ baġitarju fid-dinja. Din is-sistema tinvolvi trasferimenti finanzjarji diretti lejn it-teżori tal-pajjiżi sħab involuti f’riformi ta’ żvilupp sostenibbli. Peress li jrawwem it-trasparenza u l-governanza tajba, l-appoġġ baġitarju jikkontribwixxi għall-ġlieda kontra l-korruzzjoni u l-ħolqien ta’ klima favorevoli għall-investimenti privati fil-pajjiżi sħab tagħna.

L-Istrument ta’ Assistenza Teknika u Skambju ta’ Informazzjoni (TAIEX) jipprovdi assistenza teknika bejn il-pari u appoġġ politiku biex jgħin fl-implimentazzjoni ta’ riformi strutturali u jtejjeb il-politiki reġjonali u ambjentali. L-esperti tas-settur pubbliku mill-Istati Membri tal-UE jżuru pajjiżi sħab biex jipprovdu sa 5 ijiem ta’ pariri.

Il-Ġemellaġġ jistabbilixxi kooperazzjonijiet istituzzjonali fuq perjodu ta’ żmien medju sa twil bejn l-amministrazzjonijiet pubbliċi tal-Istati Membri tal-UE u l-pajjiżi benefiċjarji jew sħab. Dan il-mekkaniżmu jappoġġja l-bini tal-kapaċità istituzzjonali permezz ta’ proċessi ta’ riforma u kooperazzjoni bejn il-pari. Il-proġetti ta’ ġemellaġġ ġeneralment jiġu implimentati fuq minn 12 sa 36 xahar.